Act 2 | KMG | STEP | Pentekoso dameŋ maickeha jaŋe mâmâc sasawa fic mocjahao qâzuckerâ ŋefârembiŋ.

Acts 2

Tiri Mâro wahawec

1 Pentekoso dameŋ maickeha jaŋe mâmâc sasawa fic mocjahao qâzuckerâ ŋefârembiŋ. 2 Ŋehapie sambâŋkonec fânâŋ moc mâŋâŋ hâhâwicne ere fânâŋ tinac ɋeŋfâfâc jaha fânâŋke wahawec. Waharâ fic ŋembiŋ ira raširâ fusucmawec. 3 Ehame jaŋerao wiac moc hawarine šocnameŋ tinac fuarâ domahuc ŋeratierâ ŋic ŋokac qizec-jeŋic sâc biricke rawec. 4 Eme Tiri Mârozi maŋjeŋicko hurâ fusucmame dâŋmarac fuŋne fuŋne dâŋembiŋ, Mârozi ru sâc bâfua-jareme dâŋe rambiŋ.

5 Eme dameŋ ira Jerusalem haeo mâreŋ sâc irecnec Judaŋic mitine jumbiŋ. 6 Eme jaŋe fânâŋ sâko i manarâ mâretec fisirâ tumaŋnehuc bipic tatara embiŋ. Ehuc aposolo jaŋe dâŋjeŋic sâc dâŋepie 7 manarâ maŋjeŋic goroŋkeme wareckerâ mumbiŋ, “Ŋic dâŋeŋgopieŋ ši jaŋe Galilaia ŋic sasawa, 8 jaŋe weniŋuc erâ dâŋnâŋec sâc dâŋepie manapene dâŋrune marac efârekac? 9 Nâŋâc ši Pataŋic â Medeŋic â Elamŋic, erâ Mesopotamia mâreŋkonec â Judaia mâreŋkonec â Kapadokia mâreŋkonec â Ponto mâreŋkonec â Asia mâreŋkonec 10 â Frigia mâreŋkonec â Pamfilia mâreŋkonec â Aigita mâreŋkonec â Africa mâreŋkonec Kirene hae rârec rârec irecnec, nâŋâc Romaŋic 11 â Judaŋic mafa â hae fâri erâ Kretaŋic â Arabia ŋic. Nâŋâc iŋuczi juhuc dâŋnâŋec sâc Anutu mâsi sâko-ticnere biŋedâŋ mupie manaŋgopeneŋ.” 12 Ŋic jaŋe iŋuc murâ maŋjeŋic goroŋkeme kâuc barâ nazaŋ gazaŋ erâ mumbiŋ, “I wemo mâsi mo?” 13 Gâcnezi ine aposolo mufec muriŋ ejarehuc mumbiŋ, “Jaŋe waiŋ opâ gapecmâc nâmbieŋte maŋjeŋic bibiriwakac.”

Petorozi fuŋne jazawec

14 Eme Petoro e âgofâcne 11 jaŋehec domahuc dâŋ hahaŋne barâ šiŋuc jazawec “Judaŋic â Jerusalem haeo juŋgopieŋ sasawa, no dâŋ ŋazape hazec-ŋeŋic râerâ mananiŋ. 15 Ŋoŋe ŋic kecši jaŋere muŋgopieŋ `Waiŋ opâ nâku maŋjeŋic bibiriwakac. Ž Iŋuc aricne. Hae miŋecne furekacte wemocko waiŋ opâ nanšapeŋ. 16 Porofete Joelezi findaŋdâŋ kecšiŋuc qâreŋkewec i sanaŋkekac hâcne:

17 Anutuzi mukac: Juku mâreŋ dameŋne bembeŋkeha,
no Mâro-nane ŋic šeŋgoma sâcke-jarepemu;
eme otâ ŋokâfâc-ŋeŋic findaŋdâŋ muniŋmu,
socɋârifâc-ŋeŋic wiac šâŋe furu honeniŋmu,
â ŋic ŋokac qizecfâc-ŋeŋic guŋ fârine mananiŋmu.
18 Erâ kiŋaŋ qaqa ŋic ŋokacfâc-nane dameŋ ira
Mâro-nane sâcke-jarepe findaŋdâŋ muniŋmu.
19 Erâ mupe faic sambâŋko šâŋe furu wiac fuaocmu,
â juwic mâreŋko fuŋne qaqa mâsi fuaocmu,
soc â šoc â hosâc rombâŋ.
20 Ʒoaŋ šâŋene hâpoocmu,
â mosa šâŋene socsoc eocmu,
ehame Wofuŋte dameŋ maickeocmu,
dameŋ biaŋ sâko hâcne.
21 Eme ira Wofuŋte šâŋe riwaseckeniŋmu,
jaŋe sisipirickonec batarac-jopazo.'

Jesure fuŋne ritu-jarewec

22 “Israe ŋicbureŋ no ŋazape mananiŋ: Jesu Nazarete haeonec e Anutuzi neŋgoc ŋesiŋ ŋecnehame ŋondeŋ-ŋeŋicko tâpiri sâko-ticnezi mâsi â wiac šâŋe furu bahuc, Anuturaonec wahawec, irec fuŋne-ticne bataniŋkeme honembiŋ. 23 E hâcne Anutuzi mârâc jaha maname fowecte hata mutaracnewec irec sâcko ŋoŋe wiac ecnehuc doc barâ ŋic qâpuc jaŋerao râepie maripoŋko qapie hâmowec. 24 E hâcne hâmoczi gozi kime Anutuzi gozi bacneme ɋârerâ faharewec. Hâmoczi e wemocko sakarezac. 25 Dawidizi ere hâcne kecšiŋuc muwec:

`No Wofuŋ hone dendeŋnehuc mi beheekopac,
e fâre-naneo domahame biric boroc mi epemu.
26 Irec bunane biaŋkeme nameŋzi mu šeri ekopac,
erâ sahac-nanezi wâc sâcne ŋec foc eocmu.
Go mi qaisocnutec hâmoc haeo šâziŋkepemu,
â Tiriŋicge mi behetec gârecke šaŋ eocmu.
28 Go jujure hata nowatumeŋ,
maigao šeri bubiaŋ guru dindiŋ bâfua-narecmu.'
29 “Âgo bureŋ, no mimiŋne-nâŋec Dawidi ere acmâc ŋazape, e hâmome duckembiŋ, eme šâŋeruŋ-ticne hone manac ehuc jueŋgopeneŋ. 30 E porofete juweczi šiŋuc manawec: Anutu e ɋâricfâc-nane jaŋeraonec moc âkendâŋneme nore ŋicwofuŋ ŋeŋetacko ŋeocte mupaŋke-narewec. 31 I manahuc juwicnao Kristo fafahare-ticnere hâcne muwec, `E hâmoc mi qikiŋnecneocmu â sahac-ticne gârecke šaŋ mi eocmu. Ž 32 Eme Jesu e hâcne Anutuzi baɋâreme fahareme nâŋe šâŋe fâri-nâŋeczi hone-fârembeŋ. 33 Eme Anutu mefârenao risie feme Tiri Mâro biŋe qanâre-kicne e hâcne Mamaczi qikiŋnecneme soreme wahame fuŋne-ticne hone manac eŋgopieŋ šine hâcne. 34 Dawidi e jahacne sambâŋko mi fewec, mâc dâŋ kecšiŋuc ine muwec:

`Wofuŋzi nore Wofuŋ âzâcnewec:
Ware fâre-naneo ŋehaŋtec,
35 râsifâcge guruc-jopape
kikegere ââtesiŋ enšepieŋ.'
36 Irec Israe ŋic mâmâc sasawa šiŋuc mana sanaŋkenšepieŋ: Ŋoŋe Jesu maripoŋko qambiŋ, e Anutuzi Wofuŋ â Kristo âkendâŋne-nârewec jukac.”

Ŋic bocjahazi maŋjeŋic bârisierâ Miti Opâ ruambiŋ

37 Petorozi dâŋ iŋuc jazame maŋjeŋic henšaŋneme e jahacne â aposolo gâcne šiŋuc mu wioc ejarembiŋ: “Ŋic âgofâc, nâŋe weniŋuc epene sâckeocmu?” 38 Mupie Petorozi šiŋuc jazawec: “Ŋoŋe maŋŋeŋic bârisierâ Jesu Kristo šâŋene biŋeckehuc Miti Opâ ruapie sâqocne-ŋeŋic tâmirezejec, eme Anutuzi Tiri Mâro tahacke-ŋareocmu wâc. 39 Ŋaŋacne â ɋâricfâc-ŋeŋic â šoricko juraŋgopieŋ, Wofuŋ Anutu-nâŋeczi hefârec-ŋopaocmu sâc, ŋoŋe hâcne Tiri Mâro biŋe qaŋare-fârekicne.” 40 Petoro e iŋuc murâ dâŋ gâcne šuhuckerâ uŋ sawaŋ ejarehuc šiŋuc jazawec: “Ŋoŋe ŋic bâbâsifucne jaŋere guruonec wiserâ wefupie rocŋopazo.” 41 Eme šoaŋ gie bapa ira ŋic 3 tauseŋ jaŋe Petorore mitidâŋ mana šakiepie Miti Opâ rua-jarepie Jesure kikefuŋfâc jaŋerao šuhuckembiŋ.

Tiwâre â nunumure gâbâ tumaŋne jumbieŋ

42 Eme aposolo jaŋe miti jaza qazuc epie mananiŋte henširiŋnehuc jumbiŋ, ehuc maŋzi roroc bâmbândeŋ erâ tiwâre â nunumure gâbâ tumaŋne jumbieŋ. 43 Eme ŋic ŋokac šeŋgoma hâwic sahac efârembiŋ â aposolo jaŋe mâsi fuŋne fuŋne bahuc jumbiŋ. 44 Opâ ruac jaŋe maŋzi šâšâfic erâ wiac sasawa-jeŋic wirec bajumbiŋ. 45 Á gâcne jaŋe ine jufu mafa wiac-jeŋic qikiŋnepie moneŋ kitâcneme âgofâc-jeŋic waha qaqane wiac basambiŋ sâc bâtâc bajarembiŋ. 46 Jaŋe šoaŋ gie bapa sâc taha ufuŋko maŋ mocjaha erâ tumaŋne jumbieŋ â tiwâ i ficjeŋic sâc nâjumbieŋ. Ehuc nânâ-jeŋic bubiaŋko bâtâc tâmiric nâhuc jumbiŋ. 47 Erâ Anutu mumbiaŋkehuc jumbiŋ. Iŋuc epie ŋic gâcnezi hone šiziwec-jopambiŋ. Eme Wofuŋ e šoaŋne šoaŋne ŋic mitizi bâpiaŋ-jopahame guru-jeŋicko ro šuhuc ejarewec.